تالاي-تالاي ساحنا تارلاندارىنىڭ جۇلدىزىن جاعىپ, باعىن اشقان قازاق ونەرىنىڭ قارا شاڭىراعى م.اۋەزوۆ اتىنداعى دراما تەاترىنداعى مۋزەيگە بيىل ەلۋ جىل تولىپ وتىر. قازاق ونەرىنە سانالى عۇمىرىن سارپ ەتكەن ساحنا ساڭلاقتارىنىڭ شىعارماشىلىعى بۇگىندە تەاتر تاريحىنىڭ قالىڭ قويناۋىنا ەنگەن. عاسىرعا جۋىق جىلداردىڭ سىرلى قۇپياسىن قابىرعاسىنا بۇككەن تەاتر مۋزەيى كۇنى كەشە كورەرمەندەرگە ەسىگىن ايقارا اشىپ, جادىگەر دارەجەسىنە جەتكەن اسىل بۇيىمداردى قالىڭ كوپشىلىكتىڭ نازارىنا ۇسىندى.
ابايدىڭ «ايتتىم سالەم قالامقاس» ولەڭىن اۋەلەتە شىرقاعان اكتەرلەر توبى كورەرمەن قاۋىمدى تەاتردىڭ ەكى قاناتىنا تىزىلگەن كوركەم دۇنيەلەردى تاماشالاۋعا شاقىردى.
مۋزەي ءتۇنىن اشىق دەپ جاريالاپ, قۇتتىقتاۋ لەبىزىن بىلدىرگەن تەاتر ديرەكتورى اسحات ماەميروۆ بۇگىندە مۋزەي قورىندا ء ۇش ءجۇز مىڭنان اسا قۇندى جادىگەردىڭ بار ەكەندىگىن جەتكىزدى. ەلىمىزدىڭ تاريحىن ناسيحاتتاۋ ماقساتىندا جىل سايىن 24 مامىردا مۋزەي كۇنىن اتاپ ءوتۋدى جوسپارلاپ وتىرعان تەاتر باسشىلىعى مۋزەيدىڭ العاشقى جاناشىرى زەينەپ مولداباەۆاعا ارنايى العىس حات تابىس ەتىپ, ومىردەن وتكەن ساحنا ساڭلاقتارىنا تيەسىلى بۇيىمداردىڭ ەتەك-جەڭىن جيناپ, كوزىنىڭ قاراشىعىنداي قامقورلىق جاساپ, جۇيەلەپ جۇرگەن مۋزەي جەتەكشىسى نارگيز تامابەكقىزىنا شاپان جاۋىپ, قۇرمەت كورسەتتى.
مۋزەيدەگى ەڭ كونە كوستيۋم «امانگەلدى» فيلمىندەگى ەلۋباي ومىرزاقوۆ كيگەن ەكى شاپانعا توقسانعا جۋىق جىلدىڭ ءجۇزى بولىپتى. ال ساحنا ساڭلاعى سەركە قوجامقۇلوۆتىڭ گريمەرلىك بولمەسىندەگى سارى شاپانى, ورىندىق, ايناسى جانە ت.ب. بۇيىمدارى جانە دە شاماسى وتكەن عاسىردىڭ 60-شى جىلدارى بولۋى كەرەك, ءا.مامبەتوۆ, ق. بادىروۆ, ت.ب. تەاتر تارلاندارى اڭگىمە-دۇكەن قۇرىپ وتىرعان كرەسلو وتكەن كۇندەردىڭ حابارشىسىنداي مەنمۇندالايدى.
مۋزەي ەكسپوناتتارىمەن كەلۋشىلەردى تانىستىرعان قازاقستاننىڭ حالىق ءارتىسى ءاسانالى ءاشىموۆ ساحنا تارلاندارىنىڭ ءيىسى ءسىڭىپ, كيەسى جۇققان كيىمدەرى مەن بۇيىمدارىنا زەر سالا قاراپ, «ارقايسىسىمىز ءۇشىن ماڭىزى جوعارى وسىناۋ قادىرلى بۇيىمدارعا مەن بەي-جاي قاراي المايمىن» دەدى تەبىرەنىستى ۇنمەنەن. ال قازاقستاننىڭ حالىق ءارتىسى ءسابيت ورازباەۆ «بۇل جادىگەرلەردىڭ ەلىمىز تاريحىندا الار ورنى ەرەكشە, ءبىزدىڭ باعا جەتپەس التىن قورىمىز» دەپ مۋزەي سورەسىندە ساپ تۇزەگەن ءار جىلدارداعى سپەكتاكلدەر افيشاسىنا كورەرمەندەردىڭ نازارىن اۋداردى. سونىمەن بىرگە ءا.مامبەتوۆ قىزمەت ەتكەن جىلداردى ەسكە ءتۇسىرىپ, تالانتتى رەجيسسەردىڭ تەاتردىڭ باعىنا بىتكەن ەرەكشە تۇلعا ەكەندىگىن ايتىپ, شاعىن ەستەلىكتەرىمەن ءبولىستى. مۋزەي جەتەكشىسى ن.تامابەكقىزى تەاترلاندىرىلعان كورىنىس بارىسىندا ءسابيرا مايقانوۆا, نۇرمۇحان ءجانتورين, شاكەن ايمانوۆ, حاديشا بوكەەۆا, شولپان جانداربەكوۆا, ت.ب. ساحنا ساڭلاقتارىنىڭ سپەكتاكلدەردە كيگەن كوستيۋمدەرىمەن تانىستىردى.
اسەرگە تولى مۋزەي ءتۇنى كەلۋشىلەر تەاتر مەترلەرىنىڭ مايلى بوياۋمەن سالىنعان پورترەتتەرىن, مەدالدارى, ماراپاتتارى, العىس حاتتارى, جانە قولدانعان بۇيىمدارىن كورۋگە مۇمكىندىك الدى. مۇندا سونىمەن قاتار تەاتر قۇرىلعان كۇننەن بەرگى ارالىقتاعى كەزەڭدەردى قامتيتىن ءار سپەكتاكلدەن تۇسىرىلگەن فوتولاردىڭ قورى تىپتەن مول. تەاتر اكتەرلەرىنىڭ ءومىربايانى, ويناعان رولدەرى, سۇحباتتارى مەن ماقالالارى, كۇندەلىكتەرى مەن قولجازبالارى, ت.ب. مىڭنان اسا جادىگەردى تاماشالاعاندا وزگەشە ءبىر الەمدى تانىعانداي كۇي كەشەتىنىڭىز انىق.
ەلميرا سەرىكقىزى,
«ەگەمەن قازاقستان»
الماتى